Ecosystem Unplugged është një nismë që promovon sipërmarrësit vendas që ndihmojnë në forcimin e ekosistemit tonë.
Duke i ftuar themeluesit t'u përgjigjen disa pyetjeve, ne duam të hedhim dritë mbi historitë dhe modelet më frymëzuese të ekosistemit.
Shpresojmë që duke u ofruar themeluesve të startup-eve një hapësirë për të ndarë njohuritë dhe përvojën e tyre, ne të gjithë do të mësojmë dhe do të rritemi së bashku.
1. Çfarë ju frymëzoi për të nisur biznesin tuaj, dhe si lindi kjo ide?
Frymëzimi për KaKtu lindi direkt nga përvoja jonë personale dhe frustrimi që ndjenim sa herë kërkonim për një pronë në Shqipëri. Tregu ishte dhe mbetet shumë i fragmentuar, i çrregullt dhe shpesh me informacion të pasaktë apo jo transparent. Kërkimi për zyrën tonë, për shembull, ishte një proces tejet i vështirë dhe konsumues në kohë. Ideja lindi pikërisht nga kjo nevojë e paplotësuar: të përdornim teknologjinë, veçanërisht inteligjencën artificiale dhe përpunimin e gjuhës natyrale, për të sjellë qartësi, rend dhe lehtësi në këtë kaos. Donim të krijonim një platformë ku gjetja e një prone të ishte intuitive, e shpejtë dhe inteligjente – praktikisht, aq e thjeshtë sa të bisedoje me një mik të mirinformuar.
2. Si ju ka ndihmuar eksperienca juaj me themelimin/ menaxhimin e KaKtu?
Çdo përvojë e mëparshme, qoftë në zhvillim software, menaxhim projektesh apo nisma të tjera sipërmarrëse, ka qenë një gur themeli për KaKtu. Kemi mësuar rëndësinë e zgjidhjes së problemeve reale, aftësinë për të menaxhuar burime të kufizuara (sidomos financiare), si dhe domosdoshmërinë e përshtatjes së shpejtë ndaj ndryshimeve. Eksperienca na ka mësuar të jemi të qetë dhe të mprehtë përballë sfidave, të ndërtojmë dhe menaxhojmë ekipe efektive, dhe mbi të gjitha, të mos heqim dorë nga vizioni edhe kur rruga bëhet e vështirë. Të kuptuarit e nevojave të përdoruesit dhe iterimi i vazhdueshëm i produktit janë mësime kyçe të aplikuara direkt te KaKtu.
3. Cilat ishin disa nga sfidat më të mëdha që përballuat në fillim, dhe si i tejkaluat ato?
Sfidat ishin të shumëllojshme: Financimi: Si shumë startup-e në fillim, financat ishin një sfidë konstante. Na u desh të punonim në projekte të tjera paralelisht për të gjeneruar të ardhura dhe për të financuar zhvillimin intensiv të KaKtu. Tejkalimi i kësaj faze u lehtësua ndjeshëm nga fitorja e Grant24 nga Agjencia e Startupeve, që na dha oksigjenin e nevojshëm për zhvillimin final dhe lançimin publik. Kompleksiteti Teknik (R&D): Sfida më e madhe teknike ishte përpunimi i të dhënave shumë të çrregullta dhe shpesh të pasakta nga tregu imobiliar. Zhvillimi i algoritmeve që mund të kuptonin përshkrimet në gjuhë natyrale (përfshirë toponimet informale apo “slang”), t’i vendosnin pronat saktë në hartë dhe të bënin deduplikimin (grupimin e njoftimeve të ndryshme për të njëjtën pronë) kërkoi një punë intensive kërkimore dhe zhvillimore. E tejkaluam përmes iterimeve të vazhdueshme, testimeve dhe ndërtimit të modeleve të sofistikuara të AI. Mbledhja dhe Standardizimi i të Dhënave: Mbledhja e mijëra pronave nga burime të ndryshme online dhe standardizimi i tyre për t’u shfaqur në mënyrë koherente dhe me cilësi të lartë ishte dhe mbetet një proces kompleks dhe sfidues.
4. Si e keni menaxhuar ekipin tuaj që të jetë produktiv dhe i fokusuar në objektivat afatgjata?
Çelësi ka qenë ndërtimi i një kulture pune të bazuar në një vizion të përbashkët dhe të qartë – të gjithë e kuptojnë pse-në pas KaKtu. Kemi përcaktuar objektiva të qarta dhe të matshme, duke i komunikuar ato hapur me ekipin. Inkurajojmë komunikimin konstant dhe transparent. Gjithashtu, fuqizojmë anëtarët e ekipit duke u dhënë autonomi mbi detyrat e tyre, gjë që nxit inovacionin dhe përgjegjësinë. Përdorimi i metodologjive agile na ndihmon të jemi fleksibël dhe të përshtatemi shpejt, duke mbajtur fokusin tek prioritetet kryesore dhe vizioni afatgjatë.
5. Si e përkufizoni suksesin për biznesin tuaj, dhe si e matni atë?
Suksesi për KaKtu nuk është thjesht një metrikë financiare. Ne e përkufizojmë suksesin si aftësinë për të transformuar një ide ambicioze dhe thuajse “shumë të bukur për të qenë e vërtetë” në një platformë funksionale, e cila jo vetëm përmbush, por edhe tejkalon pritshmëritë fillestare. Suksesi më i madh është kur shohim që përdoruesit realë ndërveprojnë me platformën, gjejnë vlerë tek ajo dhe u zgjidhet një problem real – kur procesi i gjetjes së pronës bëhet vërtet më i lehtë dhe më efikas për ta. E matim suksesin përmes: angazhimit të përdoruesve (numri i kërkimeve, përdoruesit aktivë), feedback-ut pozitiv, rritjes së bazës së përdoruesve, mbulimit dhe saktësisë së të dhënave, si dhe arritjes së objektivave strategjike të përcaktuara në roadmap-in tonë.
6. Cilat kanë qenë disa nga fitoret më të mëdha të angazhimit tuaj?
Zhvillimin dhe implementimin me sukses të teknologjisë sonë bërthamë: aftësia për të kuptuar kërkimet në gjuhë natyrale shqip (dhe gjuhë të huaja), dhe për të përkthyer përshkrimet shpesh kaotike në vendndodhje të sakta në hartë. Zgjidhjen e problemit kompleks të deduplikimit dhe pastrimit të të dhënave në një shkallë të gjerë. Fitoren e Grant24 nga Agjencia e Startupeve, e cila ishte një validim i rëndësishëm dhe një mundësi kyçe për të përshpejtuar zhvillimin. Lançimin e suksesshëm publik të platformës KaKtu.al më 27 Shkurt 2024, duke e bërë mjetin tonë të aksesueshëm për të gjithë. Marrja e feedback-ut fillestar pozitiv nga përdoruesit që konfirmon se jemi duke zgjidhur një problem real.
7. Çfarë këshillash financiare do t’i jepnit një sipërmarrësi të ri?
Jini brutalish realistë me parashikimet tuaja financiare. Planifikoni për më të keqen, shpresoni për më të mirën. Instrumentet e financimit po shtohen vit pas viti dhe ekspozimi ndaj tyre eshte kyç. Miremenaxhimi i mjeteve financiare eshte sfida e cila do t’ju shoqërojë përgjatë gjithë rrugetimit tuaj.
8. Cili është vizioni juaj për kompaninë në 5-10 vitet e ardhshme?
Vizioni ynë për KaKtu shkon përtej një motori kërkimi për prona. Në 5-10 vitet e ardhshme, ne synojmë: Të bëhemi platforma qendrore e “inteligjencës së territorit” në Shqipëri dhe rajon, duke pasuruar të dhënat tona jo vetëm me prona, por edhe me informacione të tjera jetike (biznese, shërbime publike, cilësi ajri, transport publik, nivele trafiku/kriminaliteti, etj.), duke ofruar një pasqyrë 360 gradë të jetueshmërisë dhe mundësive. Të mbulojmë të gjithë ciklin e transaksionit imobiliar – nga kërkimi dhe zbulimi, tek aplikimi për kredi, menaxhimi i kontratave ligjore, deri tek marrja e “çelësave në dorë”, gjithçka në mënyrë transparente dhe intuitive. Të zgjerohemi gjeografikisht, fillimisht në rajonin e Ballkanit, dhe potencialisht edhe më gjerë. Potencialisht, të aplikojmë teknologjinë tonë të përpunimit të të dhënave edhe në vertikale të tjera komplekse (p.sh., tregu i makinave).
9. Cfarë këshillash do t’u jepnit të rinjve shqiptarë që duan të krijojnë startup-e apo të angazhohen në teknologji?
Gjeni një problem real që ju apasionon dhe që e kuptoni thellë, mundësisht një problem që e shihni në kontekstin tuaj lokal. Mos prisni për idenë “perfekte” apo për momentin “perfekt” – filloni të ndërtoni diçka, qoftë edhe të vogël (MVP – Minimum Viable Product), dhe iteroni bazuar në feedback. Nëse koha për produktin ska ardhur, mos harroni ta ri eksploroni pas disa kohëh. Ky të paktën ishte rasti jonë.