Tirana është një qytet që ofron shumë lehtësi për të apasionuarit pas sipërmarrjes dhe inovacionit. E vendosur në zemër të Ballkanit, qyteti ka të gjitha mundësitë për të qënë qendër teknologjie me impakt në rajon.
Digital Tirana është një iniciativë e ndërmarrë nga Drejtoria e Inovacionit, pjesë integrale e Drejtorisë së Përgjithshme të Teknologjisë së Informacionit, Inovacionit dhe të Dhënave në Bashkinë e Tiranës. Kjo platformë sjell së bashku një sërë elementësh të sektorëve privatë dhe publikë për të mbështetur startup, sipërmarrës, aktorë të ekosistemit si dhe për të dhënë një informacion gjithëpërfshirës për nomadët digjitalë.
Tirana është një nga ekosistemet me rritjen më të shpejtë në rajon. Digjitalizimi, inovacioni dhe sipërmarrja kanë marrë një fokus të veçantë e sidomos në formimin dhe përthithjen e aftësive të reja digjitale tek të rinjtë.
Digital Tirana është një pikë aksesi për të njohur më shumë mbi dinamikat e ekosistemit të sipërmarrjes dhe inovacionit. Nëse të duhet të njohësh më shumë mbi sipërmarrje, networking, evente, aktorë, mentorë, etj të ekosistemit, do të mund t’i gjesh në Digital Tirana.
Tirana është qyteti i transferuar tashmë në një laborator teknologjik, inovacioni dhe sipërmarrje duke ushqyer kështu këtë frymë të re dhe energjike përmes programeve publike dhe jo publike. Bashkia e kryeqytetit është në zhvillim të vazhdueshëm për të sjellë programe të ndryshme mbështetje, financimi dhe ekspertizë për start-upet dhe komunitetin sipërmarrës. Evente të njëpasnjëshme, projekte, fushata të ndryshme, oportunitete të gjitha këto me misionin për të mbështetur të rinjtë, talentet dhe për t’i frymëzuar të gjithë anembanë Shqipërisë.
Digital Tirana synon të promovojë, lehtësojë dhe pasqyrojë çfarë ndodh në ekosistem përmes bashkëpunimeve, partneriteteve dhe iniciativave me aktorët lokal dhe ndërkombëtar që dëshirojnë të punojnë dhe kontribuojnë në rritjen e cilësisë dhe frymës sipërmarrëse dhe teknologjike. Të gjitha këto, Bashkia Tiranë i bën me besimin se çdo iniciativë sipërmarrëse dhe digjitale do të ndikojë pozitivisht në cilësinë e jetesës së qytetarëve të Tiranës dhe më tej. Dhe ky, është vetëm fillimi.
